我pass左兩個星期,考左四次,今年22,諗住存錢幾個月後一次過想買部二手hiace做私家車(本人唔介意),等到自己渣熟左路熟左,睇下出邊有路數先至漸漸轉行,咁樣好唔好?咁我想問:
1.我既燕梳要比幾錢?燕梳呢樣野係唔係比一次就以後唔使比架?
2.牌費4個月係咩意思?一年又係咩意思?有咩分別?照我既情況我用4個月好定係1年好呢?
3.出黎做電召要幾多cc就夠?年份又關唔關事?用油渣好定係電油好?
4.第三保一定要買,咁我需唔需要買全保?
5.如果架車放在月租$600/月既停車埸拍住唔用,咁我既養車費係唔係個個月只係比$700養車了(除左牌費及驗車費)?係唔係咁計架?咁養車都唔係好得人驚0者-.-,d人就係成日咁樣嚇人,搞到人唔敢出車,呵
請前輩比多d意見我!!感激!!
>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
首先，你當然可以買架hiace當私家車用，其實有好多人都係咁，但若果你純粹只係想有架車可以得閒渣下既，除左hiace，其實仲有好多更好既選擇。另外關於你想轉行呢個問題，我覺得你要問清楚自己，自己係咪真係鍾意做運輸呢行？係咪真係適合做呢行？要記住，鍾意渣車並不代表鍾意、適合同需要做運輸，要三思。
1) 你買架咩款咩年份既車，係會直接影響倒你份燕梳要比幾錢甚至出唔出倒份燕梳。以你既情況，唔夠年齡，唔夠牌齡，掃把佬呀！荀呀！呢類跑車一定出唔倒燕梳，當你係買hiace，好保守估計，出份三保起碼七八千，全保最少都萬二三。而燕梳係要每年買，燕梳有一樣叫無意外索償折扣NCB，NCB類似比折頭你買燕梳，只要你份燕梳無比人索償過，咁你既NCB就每年遞增10%，即係話，你份燕梳會一年平過一年。
2) 牌費即係你每年續行車証既費用，而每年續行車証時，你可以選擇一次過比一年錢去續牌一年，或每四個月，又稱一季，咁一年分三次黎續牌，但分開比既合計費用會比一次過比既費用貴DD，無話邊樣好，睇你實際需要。
3) 出黎做電召無話要幾多cc就夠，即使你係D細cc既貨van仔，大多台都唔介意收你，反正係你比錢D台，但咁細架車載倒幾多貨先得架！載唔倒多貨，柯打自然少。其次，車齡唔算太大問題，最緊要唔好岩岩慚慚。而用油渣定電油，唔洗講，一定係油渣。
4) 簡單D黎講，車既燕梳只會選擇全保或第三保，全保係保人地之餘保埋自己，而第三保就只係保人地，舉例，如發生意外，而法庭又判你輸，對方向你索償，咁就會係你份三保賠比佢，如你買既係全保，咁除左賠比佢之餘，亦可以賠埋比你，或者你架車唔見左都可以賠，但你需要支付墊底費，通常新牌墊底會好高。若果架車當時車價唔高，一般都只會買三保。
5) 如果你架車放左係個$600/月既月租停車埸泊住唔用，唔計燕梳、牌費及驗車費，可以話每個月只係用$600養車…….但，架車就咁停係度唔郁養黎唔知有乜意思，而且架車唔郁之餘，你間唔中都要著車run下，最簡單舊電池擺得耐唔著車差翻，舊電池又會打柴，即使唔行車，偈油都會有夠期既時候，何況你唔行車，偈油就更易變質……仲有好多野係即使你唔郁車都要洗你錢。
總之一句講曬，養車並唔係你想像中咁易，我咁耐以黎有過三架貨Van同一架貨車，新車時就供到氣咳，供完之後就好D，但無耐，架車開始舊，毛病同零件老化，維修同換零件既費用又多左，家下我渣緊新車，每月唔計油，我最少都要預$7500出黎養佢，我都做過新牌仔，我明白你既想法，但你諗清楚D先啦！
參考資料:
http://www.van100.com
