Jan 26
不小心和朋友的車碰撞，車身的油(綠色)留在對方(銀色)的車身上，用粗腊可以弄走它嗎？另外有一處大約2cm的刮痕，面油甩了？可以如何處理?價錢貴嗎？
>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
車身既油留左係對方既車身上，可以試下用D粗臘捽下，一般都可以整走。
而另外有一處大約2cm既刮痕，若果面積唔大，只係有D甩油而又無凹，可以到一般既汽車用品店下配返枝岩色既補油筆，只係幾十蚊，試下自己補油，再用較幼既水沙紙省返平，再用D粗臘捽下。
但如果面積大的話，咁就要搵車房搞。若果你有相熟車房，你當然可以比佢搞掂。但若果你無相熟車房的話，你就要小心比人開天殺價。
一般噴油分噴油同焗油兩種，前者故名思意即係淨噴油，如果有凹的話，師傅會先執返個型，再噴油，待乾，再用水沙紙省返平滑，最後車臘。而焗油同噴油所做既野相同，分別在於噴油同待乾既過程係焗油房進行，出黎效果當然焗油靚D啦！
價錢方面，由於呢D係手功野，所以可以相差好遠，噴油最平由$600到$2000一件都有，一般公價$800-$1000一件，要執灰的話一般加多$200-$500，但你果度要執灰既地方只係好小，一般都唔會加你錢，而焗油一般由$2000起。
參考資料:
http://www.van100.com
