唉…我部新van落地都唔夠兩個月, 前日在停車場又發生意外!
當我右轉時, 右後門撞到條柱, 結果柱上面d黃黑斑馬線油摑哂落車門, 好彩我用火酒已抺掉, 但車門花得好緊要, 有好多條又好長的花痕, 好似比界刀界完咁, 見到白色, 本身部車係銀灰色, 咁即係唔係叫做”luck"油? 仲有一個約五毫字大的”笠”痕! 點算好? 我部車新嫁, 好心痛! 有人叫我去旺角買補油筆, 係唔係得嫁? 用粗蠟打番, d花痕會唔會消失?
>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
照你所講，花左個位置都相當當眼同大面積，以下係我平時對架車hi花碰損既處理方法，你可以參考一下。
若果面積唔大但有D甩油而又無凹，可以到一般既汽車用品店下配返枝岩色既補油筆，只係幾十蚊，試下自己補油，再用較幼既水沙紙省返平，再用D粗臘捽下。
但如果面積大的話，咁就要搵車房搞。若果你有相熟車房，你當然可以比佢搞掂。但若果你無相熟車房的話，你就要小心比人開天殺價。
一般噴油分噴油同焗油兩種，前者故名思意即係淨噴油，如果有凹的話，師傅會先執返個型，再噴油，待乾，再用水沙紙省返平滑，最後車臘。而焗油同噴油所做既野相同，分別在於噴油同待乾既過程係焗油房進行，出黎效果當然焗油靚D啦！
價錢方面，由於呢D係手功野，所以可以相差好遠，噴油最平由$600到$2000一件都有，一般公價$800-$1000一件，要執灰的話一般加多$200-$500，若果要執灰既地方只係好小的話，一般都唔會加錢，而焗油一般由$2000起。
個人建議，如果你本身係新牌仔的話，而花左果度又唔會太過令你唔開胃既，不如渣住先，操多一排。
但若果你真係接受唔倒隻門花左，其實單件做返，一般噴油師傅都可以做倒新舊色對返九成，睇落去都唔會好覺返噴過，況且你架仲係新車，應該仲易對色，相信搵個好D既師傅，分分鐘睇唔出呀！以車門既大小計，你預手功ok既果D師傅大約開你$1000至$1200，最後提一提你，收貨時記得從唔同角度同反光咁望多幾篇，如果你架車唔係趕住用，收貨時如果發現手功有問題，唔洗怕唔好意思，老虎蟹叫佢做過，D噴油佬吹你唔脹架。
參考資料:
第一客貨車電召中心 www.Van100.com 熱線 31711111
