1. 係唔係買左架貨van就可以上台?
2. 上台後係點樣接生意? (係唔係會有部call機? 定係打電話比你?)
3. 做九龍會唔會要揸到去香港區?
4. 開工時間定唔定? 點出糧?
5. 平時無野做時係唔係週街停低等call? (因為我見留下有時會有貨van司機訓覺!)
6. 唔係太差收入會有幾多? 上台費要幾多? 油錢一個月又要幾多?
希望有心人可以解答到我!!
十萬個唔該!!
>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
1 ) 基本上買左架貨van就可以上台，除非你架van殘到D台都唔收。
2 ) 一般D台都係用對講機，行內叫台機，即係的士果D黎出柯打，有少部份用打電話出。
3 ) 當然有咁既機會揸到去其他區啦！但我估你意思係咪問，如果你係九龍會唔會要特登揸到去香港區接柯打，你睇埋下面就明。
4 ) 開工時間唔定架，基本上個台開工，你就可以開工，有D台仲有24小時營業。而入台係無糧出既，而係每做完一個柯打就即刻同個客收錢。
5 ) 佢地唔算係週街等架，一般佢地會係站頭等出柯打，你留意下，佢地通常唔會得一架半架。
6 ) 收入唔定架，睇你每日做幾耐，有無柯打，好彩既，淨做台料一日可以過山，唔好彩既，淨做台料一日可能得兩三舊，油錢亦無定，你架車大食D細食D又唔同，柯打多D少D又唔同。
簡單講講，買左架貨van，選擇入邊個台，大台車多柯打多台費自然貴，同樣，細台車少柯打少台費自然平，先比入線費，入線費由唔洗入線費至幾千蚊都有，入線費只係比一次，比台費，台費由幾百至千幾一個月，有D台台費又有分貼台Logo同唔貼台Logo掛牌，唔貼台Logo會比貼台Logo貴三幾百，仲有貼紙、電訊牌、單簿呢D雜費，有D台既入線費已經包埋，單簿用完再比錢買，揀call 嘥，即係車number，咁就可以開工。
開工前，先問清楚各區站頭位置，到你開工時，你揸架車到站頭，然後同台姐報call 嘥，例如：313威力咁，威力係某台響火炭既站頭名，因為果度有座威力工業大厦。之後台姐收倒就會覆你排第幾，例如：313四車咁，即係你排第四，咁個台收倒響附近D柯打，台姐就會跟次序出，例如：123，火炭華樂去九龍灣邊度邊度，價錢幾多幾多咁，之後就去接個客，完成，收錢。
最後，我個人勸你，如果你無真真正正做過或者接觸過呢行，我勸你無謂諗喇！如果你手頭上連一D基本可以維持部車既皮費既散客都無的話，齋跑台，除晒皮費，仲少過求其打份工，出面大把貨van佬一個月養車七除八扣，淨底得果三四千，加上而家D台費、油價又貴，柯打又平，加上過埋年果兩個月又靜，你想清楚先啦！
參考資料:
第一客貨車電召中心 www.Van100.com 熱線 31711111
